හදිස්සියේම යාලුවෙක් හම්බු වෙන්න අවිස්සාවෙල්ලෙන් බස් එකේ නැග්ග මට ඉඳගන්න ලැබුනේ සීට් තුනේ පේලියක අන්තිම සීට් එකේ.., ජනේලේ පැත්තේ ටිකක් වෙනසක් තියෙන අමුතු ආකාරයේ [ඒ අමුතු කියන්නේ බස් එකේ හිටපු අයට සාපේක්ෂව වෙනස් විදියට ඇඳ පැලඳගෙන හිටි දෙන්නෙක් නිසා.]ජෝඩුවක්. කොන්දොස්තර මහත්මයා මගෙන් ටිකට් ගන්න ළඟට එනකොටත් දෙන්නගෙන් ගෑනු ළමයා හිටියේ පිරිමි ළමයාගේ උරහිසට ඔලුව තියාගෙන, අවුකණ්නාඩියක් දාගෙන හිටිය නිසා පිටට ඒ ඇත්ති නිදිද අවධියෙන්ද කියලා හිතා ගන්න බෑ.. මෙහෙම ඉන්නාතරේ එක පාරටම හිස කෙළින් කරගත්තු අර ගෑණු ළමයා අර තරුණයාගෙන් මෙහෙම ඇහුවා...

ඔයා ජැපෑන් ගිහින් තියෙනවද?

මෙහෙම ඇහුවම අර තරුණයා ටිකක් නොසංසුන් උනා.. ඒත් ඒ බව පිටට නොපෙන්වන්න උත්සහ කල ඔහු මෙහෙම කිව්වා..

ඔව් ඒ ලෙවල් කරලා ස්කොල් එකකින් සිලෙක්ට් වෙලා මම හයර් ස්ටඩීස් කලේ එහෙ.

ඇයි එක පාරටම එහෙම ඇහුවේ ?
නෑ මම නිකම් ඇහුවේ..,

එහෙ තියෙන්නේ හරි ෆ්‍රී කල්චර් එකක් කියලා අහලා තියෙනවා.
ලස්සන කෙල්ලෝ එහෙම ඉන්න ඇති?

හමේ පාටේ වෙනසයි මූනේ වෙනසයි එක්ක පොඩි අමුත්තක් තිබ්බට ඔයාලා වගේම තමා.., බොඩි කිට් වෙනස් උනාට සේම් ඇන්ජින්.,

තරුණයා උත්තර දුන්නේ ඒවාට උත්තර බඳින්න කිසිම උවමනාවක් නෑ වගේ

හිත ගිය අය එහෙම ඉන්න ඇති, මම කිව්වේ ඩේට් කල අය එහෙම..?
හ්ම්ම්

මොකෝ මම අහන ඔක්කොටම හ්ම්ම් හ්ම්ම් ගාන්නේ බස්සෙක් වගේ?
කෙටියෙන් ම කියන්න ඔයාට මොකද්ද දැන ගන්න ඕනේ..?

නැහ් මට එහෙම මොකවත් දැනගන්න ඕනේ නෑ..,
ඇයි ඔයා එහෙම අහන්නේ..???
මම එහෙම ඇහුවේ මගේ ජීවීතේ අවුරුදු 2 කට කලින් වෙච්චි දේවල් එකපාරටම හෙන ගහන්නා වගේ අවුස්සනකොට..,
ඊයේ මම ඔයාගේ කාමරේ අස් කරනකොට ඇඳ යට තිබිලා පෙට්ටියක් හම්බුනා.., ඒකේ තිබුනා ඔයා ජැපනීස් ගර්ල් කෙනෙක් එක්ක ඇඳක් උඩ ඉඳන් ගත්තු පින්තූරයක්.. ඒකයි.., කෙල්ල නම් ලස්සනයි ඒත් ඔයා එක්ක විශ්වාසෙන් ඉන්නවා කියලා හිතුනේ නෑ, ඒ ඔයාගේ ජැපෑන් වල ගර්ල් ෆ්‍රෙන්ඩ් කෙනෙක් ද?

ඉතින් ඒ කෙල්ල එක්ක මම ඇඳක් උඩ ඉඳන් ගත්තු පින්තූරේත් හරි.., ඒ කෙල්ල මා එක්ක සම්බන්ධයක් තියෙනවා කියලා ඔයා කොහොමද කියන්නේ, ඔහොම සැක කරලා අපි දෙන්නා කොහොමද එකතු වෙන්නේ?? අනික ඔයා දන්නවා මම ජැපෑන් වල වර්ක් කලේ ලවු හොටේල් එකක රූම් සර්විස් සෙක්ෂන් එකක බව.

අනේ නෑ ජනූ, මම එහෙම අවිස්වාසෙයක් තියාගෙන ඉන්නවා නෙවෙයි. ඔයා දන්නවා නේ මම එහෙම පරණ විකාර ඔලුව තියාගෙන ඉන්න කෙල්ලෙක් නෙවෙයි කියලා.
මම එහෙම ඇහුවේ දැනගන්න. හිටියා කියලා මට එහෙම අවුලක් නෑ.., ඔයාගෙන් මම එහෙම ඇහුවේ ඔයා ඔය මේ දැන් ඇඳගෙන ඉන්න ටීෂර්ට් එක ඒ පින්තූරේ ඇඳගෙන හිටියේ ඒ කෙල්ල ඒකයි.

එකවරම බොහොම හදිස්සියෙන් සාක්කුවේ තිබ්බ අව්කණ්ණාඩි දෙක අරන් ඇහේ පටලවා ගත්තු ඒ තරුණයා තමන්ගේ ස්පර්ෂ සංවේදී ජංගම දුරකතනේ නොදන්නා මොනවාදෝ හොයන්න ගත්තා.
සියුම් මදහසක් මුවේ තියාගෙන හිටපු ඒ තරුණිය ආපහු අර තරුණයාගේ උරහිසේ හිස තියාගෙන ජනේලයේන් එළියේ වේගෙන් ඇදෙන ගහකොල දිහා බලා ඉන්නට වුනා.

පහත ලිවීම : ගෙදර ආවම මොනාද මේ ලවු හොටේල් කියන්නේ කියලා ගූගල් දෙයියාගෙන් ඇහුවම මුලින්ම ආවේ මෙන්න මේ විකීපීඩියා ලින්ක් එක

මීට වරු කිහිපයකට ඉහතදී විලියම් කුමාරගේ බිරින්ඳෑ සයිලන්සරයක් ප්‍රසූත කිරීම නිසා ඉහළ යුරෝපය සහ පහල යටත් විජිත ප්රීති ප්‍රමෝදයෙන් ඇළලී ගොස් ඇති බව කවුරුත් දන්නා බව සිතමි..., ලංකාවේ මේ තත්ත්වය ඒ තරම්ම උත්සන්න නැති වුව, ආරංචිය කණ වැකුණු උපාසකම්මලා හනේ සාදු කොලු පැටික්කෙක් කියා දෝහෝත්මුදුන් දී කියූ බව ඇසින්දුටු සාක්කී පවතින බව මට කිව්වේ එහා ගෙදර සේමරත්න මාමා ය.

ඔයිට කලියෙන් අපේ ගෑණි ඉස්සරෝම අර ඩයනා කුමාරි උමං පාරේ හැප්පිලා කියලා ආරංචිය ලැබුනු ගමන් ඉහේ අත තියාන විස්සෝප උනේ "අනේ ඉතින් අම්ම නැතුව අර කොල්ලෝ දෙන්නා කෝම හැදෙයිද කියලා"
මං කොච්චර කිව්වද උන් දෙන්නා රජ පැටවු දෙන්නෙක් කියලා කොහෙද අපේ යෝදි නෙවීනේ සතේකට මායිං කලේ.

සේමරත්න මාමා පරණ මතකය ඇවිස්සුවේ විලියම් කුමාරගේ දරුප්පත්තිය අලුත්ම පුවත වීම නිසා වෙනි.

එකල ඩයනා කුමාරිගේ අභාවය ඇසූ විශ්ව විද්‍යාල සිසුවෙක් බිත්තියක තම අදහස ලියා ඇති ආකාරය විකල්ප පත්තරයක් පලවූ අයුර තවමත් මගේ මතකයේ තිබේ.

ඩයනා සුපෙම්සරා
සමඟින් ඩොඩී අල්පයිඩා
බනිසේ නැගී ගියා
උමගේ හැපී මලා

කේට් කුමාරිගේ සහ විලියම් කුමාරගේ දරුවා ගේ අනාගතයට අප සුභ පැතුවද නොපැතුවද සැපවත් වනු ඇත. ඒ නිසා මගේ අවධානය යොමුවන්නේ අද සවස 1.30ට ආණ්ඩු පක්ෂයට පියෑඹු විපක්ෂයේ flying fish ගැනය.
 

Flying fish
 

ඒ කතන්දර මේ ආකාරයෙන් තියෙද්දී, අපේ ධර්මද්වීපයේ මේ රෝයල් ප්‍රසූතිය පරසිදූ වීමට එරෙහිව වූ අකටයුතුකම් නම් අපරිමානය. ඉන් ප්‍රධානම එකක් නම් දයාසිරි ජයසේකර මංත්‍රී තුමා අද සවස 1.30ට විපක්ෂයේ සිට ආණ්ඩු පක්ෂයට ඈඳිගන්නට යාමයි. විපක්ෂයක මළගමද කියා සිතෙන තරමට පිරිහීම් වෙත්දීත් ඉවසූ දයාසිරි, නායක තුමාගේ හාෆ්ශීට්කොලයක් වැනි මුහුණුත්තහඩුවේ කියවෙන දේ කියවාගන්නට  අසමාර්ථවීම මේ ඉවත් වීමට ප්‍රධානම හේතුව බව ලියන අය විශ්වාස කරයි. 

කොහේ ගියත් ලියන අයගේ පොතට අනුව දයාසීරි යනු කලු චරිතයක් නොවේ.., අනාගතයක් නැති පාරක යනවාට වඩා කාපට් දැමූ හරස් පාර හොඳ බවට සිතා රැවුල්පක්ෂ තුමාගේ දෑත් ශක්තිමත් කරන්නට යාම එක් අතකින් දයාසිරිගේ ජයග්‍රහණයකි. ඒ වාගේම ඔහුගේ දේශපාලනයට ඉතා ඉහල බලපෑමක් කරන්නට හැකි තීරණයකි.

පක්ෂ පාට වලට බෙදී කොතරම් තවුසන්ඩ් ටෝක් ඉශූ කලද දෙපසේම සිටින්නේ මිනිස්සු සහ තමන්ගේ අනාගත ජීවිතය සැපවත් කර ගැනීමේ අදිටනින් සිය "රැකියාවේ" නියැලී සිටින රැකියා නියුක්තිකයින් පිරිසකි. වෙනස ඇත්තේ උන් ව පත්කර යවා ඇත්තේ අපගේ අහිංසක කතිරය විසින්ම බව අමතක වීමයි.

කොතෙක් කතන්දර කීවද දයාසිරීගේ තීරණය වෙනස් වන්නේ වත් එක හීනෙන් එළිවන්නේ වත් නැත. ඒ වාගේම දයාසිරි හෝ රනිල් හෝ කිසිවේකුට අබමල් රේණුවකවත් අවැඩක් වන්නේ නැත. මහින්දගේද ඒකායන පැතුම වන්නේ තමාගේ ධූරකාලය තුල රනිල් විපක්ෂ නායකත්වයේ සිටීම බවට මෙන්න කැට..

එහෙත් වසර විස්සක මේ මහා පරාජයේ පරිමිතිය දැන්වත් වෙනස් වන්නට කාලය එළඹෙමින් තියේ. දයාසිරි තවත් වසර 10 කට වත් මහින්දව වට්ටන්න බෑ කියා කියුවද පොදු පෙරමුණේ ආසන ටික මේ ආකාරයෙන් යූඑන්පීයේ ඉගිල්ලෙන මාලුවන්ගෙන් පිරෙන්නට පිරෙන්නට වන්නේ පෙරමුණේ යටින් වැලිකැටය දෙක හෙමින් සැරේ හායනය වීමයි.
කලයුත්තේ බලාසිටීම හැර අන් කිසිවක් ම නොවේ.

       ජීවිතය කියන්න අපි හැමෝටම අයිති දෙයක්, ඒ ජීවිතය වඩාත් වර්ණවත් වෙන්නේ අපි ඒ වෙනුවෙන් ජීවිතය සඳහා තමන්ට අයිති යුතුකම් සහ වගකීම් කොටස හරියට ඉටු කරනවා නම් පමණයි, කලයුතු යුතුකම් කොටස් කෙනාගෙන් කෙනාට මෙන්ම සිතුවිල්ලෙන් සිතුවිල්ලට වෙනස් වෙනවා මෙන්ම මෙන්න මේ තමා යුතුකම් හෝ මෙන්න මේ තමා වගකීම් කියා කැටගරි ගත කර පෙන්වන්නට හැකියාවක් නෑ.., ඒ උක්ත ක්‍රමවේදයන්ගේ විචල්‍ය භාවය නිසාවෙන්මයි.
එකිනෙකාට තමන්ගේ යුතුකම් කොටස ඉටු කරන්න හෝ සිය වගකීම හරි හැටි ඉටු කරන්නට වෙරදරන මානසිකත්වයක් තුල ඒ යුතුකම් හා වගකීම් අනෙකාගේ සුඛවිහරණය සඳහා කුඩා හෝ දායකත්වයක් පලකරන්නට හැකියාව ලැබෙන අවස්ථා රාශියක් අවට ලෝකය තුල අපට ලක්ෂ්‍යගත කර පෙන්වන්නට පුලුවන්..., ලේ දන්දීම ඉන් එක දායකත්වය පලකිරීමක්. එහෙව් ලේ දන්දීමේ පින්කමකට මුල පුරන්නට අන්තිම පේලිය හෙවත් the last row කණ්ඩායම මුල පුරා තිබීම අද්විතීයයි.
ඔවුන් එයට නිමිත්තක් කරගෙන ඇත්තේ මෙයට වසරකට පෙර අප අතුරින් වියෝ වූ සනත් විජේවර්ධන සහෘදයාවයි.., බ්ලොග් ලෝකය තුල Observer නො එසේනම් "ඔබාමාමා" යන ආදරණීය නාමකරණය ලැබූ ඒ අපූරු පුද්ගලයාට පිං පිණිසයි. වැල්ලවත්ත ජාත්‍යන්තර බෞද්ධ මධ්‍යස්ථානයේ දී අප්‍රියෙල් මස 28 වන ඉරු දින උදෑසන 9 සිට සවස 3 දක්වා සිදු කෙරෙන මේ පිංකමකට වඩා යුතුකමක් වන මේ ඉසව්වට අන්තිම පේළියේ සහෘදයින් ඔබ හට ආරාධනා කරන්නේ සුපුරුදු හිතවන්ත බවින්ම යි.
මේ ඉසව්ව සඳහා මාධ්‍ය දායකත්වය දක්වන බස්‍ රේඩියොව ඔබව නිරතුරුවම දැනුවත් කරනු ලබන අතර මේ වනවිටත් මූණුපොත් හරහා පැතිරෙන අදාල ඉසව්වේ තොරතුරු රැගත් පෝස්ටර ඔබට ඒ සඳහා සහභාගි වීමට පාර කියනු ලබනවා ඇති. 

එන්න ජීවිතයක් ජීවත් කරවන්න ජීව හුස්ම පිඹින්න ලේ බිඳක් දන් දෙන්න..!

පහත ලිවීම►
කාලෙකින් මොකුත්ම ලියාගන්න දෙයක් නැතිව ඉන්න අල්ලපනල්ලේ දී වීතරාගී කතා කලා. ඈ ඒ පොඩි වෙලාවට කිව්ව දේ අමතකවෙනවට මෙතනත් ලියලා තිබ්බොත් හොඳයි කියලා මට හිතුනා.
ගිහින් එන්නං!

මොනවත් ලියපු නැති නිසා කලෙකින් ආපහු මේ පැත්තේ ඇවිල්ලා මොනවා හරි කුරුටු ගාලා යන්න ඕන කියලා හිතෙනකොට මොකද්දෝ කම්මැලි කමක් එක්ක මිශ්‍ර වෙලා එන හැඟීමක් හිතේ ඇතිවෙනවා.., පහුගිය දවස් ටිකේ උදේ පාන්දර වැඩට ගිහින් ගෙදර ඇවිත් නාලා කරලා එක්කෝ පොතක් එහෙමත් නැති නම් චිත්‍රපටයක් හරි සින්දුවක් හරි අහලා බලලා කරලා වේලාසනින් නින්දට යන එක තමා පහුගිය සති ටිකේම මගේ රූටීන් එක වෙලා තිබ්බේ.
ලියවිලි වලට පොඩි නැවතිල්ලක් තිබ්බ වෙලාවේ මට හම්බ වෙච්චි පොත් ටිකයි, සින්දු ටිකයි නං මසුරං. මේ කියන්න යන්නේ ඒ ගැන..,
අහලා තියෙනවද සුනිල් මිහිඳුකුල මහත්මයා ගැන.., නම කිව්ව සැනින් මතක නැති නම් ලේක් හවුස් පත්තර වල දිනමිණ, සිළුමිණ, සරසවිය, රසඳුණ වගේ පත්තර වල විටින් විටේ විතැන් වෙමින් සිය ලියමන් කරපු කෙනෙක් ගැන.., එහෙමත් නැතිනම් මේ පත්තර වල පලවුණු පික්චර් පිස්සා තීරුලිපි පෙළ ගැන.., ආන්න ඒ තීරු ලිපි පෙළ ලියන්නේ සුනිල් මිහිඳුකුල. එතුමා ප්‍රසන්න විතානගේ එහෙමත් නැතිනම් ක්‍රිස්ටි ෂෙල්ටන් ප්‍රනාන්දු වගේ අය එක්ක ග්ලෝබ් මුද්‍රණාලේ තුලින් එළි දැකපු සකුරා කියන විකල්ප සිනමා සඟරාවේ ආරම්භක සාමාජිකයෙක්. ඔහු දිගු කාලයක් ලියාගෙන ආපු පික්චර් පිස්සා තීරු ලිපි පෙළින් තෝරාගත් ලිපි එක්කහු කරලා පොතක් විදියට එළි දක්වලා.., අහම්බෙන් වගේ අවිස්සාවේල්ලේ ගුණසේන පොත් සාප්පුවට ගිය වෙලාවේ මේ පොත ඇහැ ගැහිලා අරගත්තා. එකදිගටම සුනේත්‍රාගේ මතක පොත එක දෙක, ගංගානාත්ගේ පැණිවළලු වගේ තීරුලිපි එක්කාසු පොත් කියවලා ලියවලා දැන් මේ වගේ පොත් කියවන්න මගේ පොත් කියවීමේ රුචිය වෙනස් වෙලාද කියලා හිතෙනවා. පෝලන්ත සිනමාව, ඇමෙරිකානු සිනමාව වගේම, රුසියානු, භාරත වගේම දේශීයසිනමාව ගැනත් අගනා ලිපි පෙළක් ම අඩංගුයි. කියවලා ම බලන්න. වෙනසක් දැනේවි.
පොත් ගැන කියවිල්ල ඇති.., අහලා තියෙනවද Deverists ගැන? Deverists කියන්නේ රියැලිටි ෂෝ එකක්.., ඒත් මේක වෙනස් රියලිටි ෂෝ එකක්.., මේක වට්ටෝරුගත වෙන්නේ ට්‍රැවල් සහ මියුසික් යටතේ.., ඉන්දියාව තුල තමන්ගේම ගීත සලකුණක් තියපු යම් ගීතයක් පළමු නෝට් එක ඇසීමෙන් ම මේ අසවල් ගායකයාය යන හැඳීනීමක් කරගත හැකි සංගීතඥයින් කීප පොළක් එක්කාසු වෙලා ඔවුන්ගේ සංගීතමය සහ භාවමය ආවේණිකතා ගීතයක් තුලදී එකතු කර එළිදැක්වීම තමයි මෙහෙදී ප්‍රධානවශයෙන් ම සිදුවන්නේ. එයට අමතර ම ඉතා විශාල උප සංස්කෘතීන් ගණනාවකින් වර්ණවත් වීමෙන් සැදී භාරතය තුල විවිධ දේශමායිම් හරහා ගමන් කරමින් ඊට අනුකූළව සංගීතය තුලින් ඔවුන්ගේ සලකුණ තැබීම තමා Deverists තුල සිදුවන්නේ..,

එයට අමතර ම ඉතා විශාල උප සංස්කෘතීන් ගණනාවකින් වර්ණවත් වීමෙන් සැදී භාරතය තුල විවිධ දේශමායිම් හරහා ගමන් කරමින් ඊට අනුකූළව සංගීතය තුලින් ඔවුන්ගේ සලකුණ තැබීම තමා Deverists තුල සිදුවන්නේ.., මේ වනකොට දෙවැනි සීසන් එක (යල?) ගෙවමින් ඉන්න මේ අපූරු වැඩසටහනේ සම්පූර්ණම කොටස් සියල්ලම නරඹන්නට මේ සබැඳිය තුලින් ගොසින් හැකියාව තියෙනවා.., සප්තස්වර අතර අරුමැසි හැකියාවන් සොයන මේ වැඩසටහන මෙහෙය වන්නේ Monica Dogra.

පොත් වලට අපි කොයි තරම් ඇබ්බැහි වෙලා ඉන්නවද කියනවා නම්, කලුවර වැටුනට පස්සේ ඉඳගෙන පොත කියවන තැනින් නැගිටලා ලයිට් එකක් දාගන්නවා වෙනුවට අඳුරට සාපේක්ෂව ඇස් දෙක පොතට ළං කරගෙන කියවන්න උත්‍සහ කරපු අවස්ථා මම හිතන්නේ අතීතය අමතක නැති පොත් ලෝලී කියවන්නෙක් නම් අනිවාර්යයෙන් ඔබටත් උරුම ඇති.
එහෙමත් නැති නම් බෝඩිමක පදිංචි වෙලා වැඩට යන එන කෙනෙක් නම් මැරිලා මැරිලා කාමරේ වැටිලා නිදියන්න එන ඔබේ මිතුරාට දෙගොඩ හරි ජාමයක් වෙනකම් ගලන ඔබේ පොත් කියවිල්ල මල කරදරයක් වෙලා ඔබේ කිසිත් නොදන්න අම්මා අප්පා මතක් කල අවස්ථා ඇති.
තමන් කැමතිම පොතේ හොඳම කොටස කියවගෙන යනකොට එක පාරටම විදුලිය විසන්ධි වී දැහැන බිඳී පොත් කියවීම උගහට වූ කෙනෙක් වෙන්නට ඇති..,
එහෙව් ආලෝකය නැතිවීම යන සාධකය කාරණා කරගෙන ඔබේ කියැවීම නවත්වා දමා ඉන්නට දැන් අවැසි වෙන්නේ නෑ.., මේ උපකරණය ඔබ ළඟ තියෙනවා නම්..,


book light!
නිවසට සුපුරුදු විදියට අඩුවැඩිය ගේන්නට ෆුඩ්සිටියට ගොඩ වැදුනු වෙලාවේ තමා මට මේ අපූරු උපකරණය හමු වුනේ.., රුපියල් 690 මිලක් සහිතව වෙළඳ පොලට මෙය නිකුත් කරන්නේ එනජයිසර් ලංකා ආයතනයි.., එල් ඊ ඩී බල්බයකින් සහ එක දිගට භාවිතා කරන්නේ නම් පැය 30ක ආයු කාලයක් පවතින CR2032 ලිතියම් වියලිකෝෂ දෙකකින් සමන්විත මේ උපකරණය පොතේ ප්‍රමාණයට අනුව නම්‍යශීලීව සකසා ගත හැකි බඳකින් යුක්තයි..,
කොටුව දෙවැනි හරස් වීදියේ නිතර සැරිසරන්නෙක් හෝ අන්තර්ජාල වෙළඳ අඩවි භාවිතා නම් මීට වටා ඉතා අඩුමිලට මේ උපකරණයම මිලදීගත හැකිවේවි.

ලියන්න දෙයක් නැති උනාම ලියවෙන්නේ මහ අමුතු දේවල්.., මේ දවස් වල ඔලුවේ තිබ්බ අදහස් ටික එක සුමේට එලියට දාපු හින්දාද කොහේදෝ මේ දවස් වල ලියවෙන්න එන අදහස් මඟක් ගිහිල්ලා ලොප් වෙලා භින්න වෙලා යන එක මහ කරුමක්කාර සීන් එකක්.., ඒ උනාට ඒ දේවල් ලියන්න වැය කල වේලාව මම කියවන්න අතෑරිච්චි පොත් කියවන්න වැය කලාම අර පාඩුව ක්‍රමක්‍රමයෙන් ශූන්‍ය වෙන්න ගත්තේ මටත් නොදැනීම.., මේ දවස් වල මම කියවන්නේ මගේ හිතාදර මිතුරියක් වන මලීගෙන් ඉල්ල ගත්තු පොතක්.., ඒක කතාවක් නොවුනත් කතුවරයාගේ කාලය සහ අත්දැකීම් වල හරස්කඩක් කියලයි මට නම් හිතෙන්නේ..,

පොත ලියලා තියෙන්නේ තිස්ස අබේසේකර, පොතේ නම අයාලේ ගිය සිතක සටහන්.., පොතේ මිලට සාපේක්ෂව එහි වටිනාකම ඉතාම ඉහලයි කියලයි මට නම් හිතෙන්නේ.., මේ ආකාරයේ ස්වයං අත්දැකීම කියවන්න මම පුරුදු උනේ සුනේත්‍රාගේ මතකපොත එක සහ දෙක කොටස් කියවන්න අරගෙන.., සුනේත්‍රා ඒ ලියපු මතක පොත තීරු ලිපි එකතුවක්.., අයාලේ ගිය සිතක සටහන් කියන්නේත් තීරු ලිපි එකතුවක්.., සරළ බසින් එදා ජීවත් වෙච්චි සමාජය ගැන සුපරීක්ෂා කාරීව ලියලා එක්තැන් කල අදහස් ගොන්නක්.

මේ වගේම තවත් පොතක් මම කියවන්න හිතාගෙන ඉන්න ලිස්ට් එකේ උඩින් ම තියෙනවා ඒ ගංගානාත් දිසානායකගේ පැණි වළලු. මම ඔය පොත ගන්නම සරසවියට ගොඩ වැදෙද්දී පොත ඉවර වෙලා ආපහු ප්‍රින්ට් එකක් එන්න ඕනේලු.., පොත් ප්‍රදර්ශනය බලන්න ගියේ නැති නිසා පොත ඇවිල්ලාද කියලා මම දන්නේ නෑ.., වෙලාවක ගිහින් බලන්න ඕනේ ඔලුව දාලා. කැමති නම් මේ සබැඳියෙන් කතුවරයාගේ ආයතනික බ්ලොග් අඩවියට ගිහින් පැණි වළලු තීරු ලිපි ටිකක් කියවන්න පුලුවන්.

ඊට අමතරව අපේ හිතාදර "මගේ මරණය" පොත් ප්‍රදර්ශනය බලන්න යනවා කීව වෙලාවේ පුලුවන්නම් කොපියක් ගනින් කියලා කියන්න හිතාගෙන හිටපු පොතක් තිබ්බා.., ඒ තමා මම කාලයක් ආසාවෙන් කියවපු බලංගොඩ සරත් මධූ ඇඳි ඉතින් ඊට පස්සේ චිත්‍ර කතාව.., ඒක මේ පාර පොත් ප්‍රදර්ශනේ දී පොතක් විදියට එළිදක්වලා තිබුණා.

මේ පොත් ඔක්කොම ඔලුවේ තියාගෙන හෙට අනිද්දාට වත් වට්ටම් නැතත් අවිස්සාවේල්ලේ ගුණසේන එකට ගොඩ වැදිලා තියෙන පොත් ටිකවත් උස්සන් එන්න ඕනේ.., ඒක මම කොළඹ ගාටනවට වඩා ලාබයි.